Color Analysis - تحليل الألوان - الاندرتون البارد والاندرتون الدافئ

( Color Analysis - تحليل الألوان )

.

في البداية لازم نعرف الفرق بين (Skin Overtone & Skin Undertone )

1-Skin Overtone

هو اللون العلوي للبشرة يعني اللون اللي بيتغير بتغير عوامل البيئة في الصيف او الشتاء أو عند التعرض لاشعة الشمس او عند عمل تان للبشرة. وهو اللون اللي بنشوفه بالعين فهنلاقي بعض الوان البشرة فاتحة وبعضها قمحية وبعضها داكنة .. 

2- Skin Undertone

هو اللون التحتي للبشرة , اللون اللي مش بيتغير أبدا ولا نستطيع رؤيته للوهلة الأولى ، ولاكتشافه لازم نعمل تحليل ألوان البشرة وهو مايعرف ب (COLOR ANALYSIS ). 

طبعا احنا كلامنا هيكون عن ال Skin Undertone وازاي اعرف الاندرتون بتاع بشرتي بسهولة وده طبعا هيفيدني في اختيار الوان الملابس والمكياج وصبغات الشعر وحتى العدسات الملونة وطلاء الاظافر , كلنا نقدر نلبس كل الألوان بس اللي بيميز كل واحده فينا درجة اللون المناسبة لبشرتها 👌

اختيارك للألوان اللي بتميزك هيضيف رونق وحيوية لبشرتك وبيخفف من مظهر الهالات وعلامات ارهاق البشرة وكمان اختيارك للالوان الصحيحة يجعلك أكثر ثقة بنفسك وبمظهرك , وكمان التسوق هيكون اسهل بكثير لانك عارفة الالوان اللي المفروض تدوري عليها ..

عند اختيارك للالوان المناسبة هيكون ليكي اطلالة ساحرة حيوية لا يكون الصدى فيها للون اللي اخترتيه ولكن لك بشكل كامل 😉🥰 ..

الاندرتون للبشرة وهو بينقسم ل اندرتون دافئ & اندرتون بارد

 ( cool undertone & warm undertone )

كل واحد فينا بيميل اكتر لالوان معينة. في قسم بيميل للالوان البرونزية والنحاسية ودرجات البني والبرتقالي واللون الذهبي وفي قسم بيميل لدرجات الألوان الازرق والكحلي والفوشيا والرصاصي واللون الفضي !

لو كنتي من الناس اللي بتميل وبتحب تلبس درجات البني والاورنج اكتر يبقى انتي اندرتون دافئ .

ولو كنتي من الناس اللي بتميل وبتحب تلبس درجات الازرق والرصاصي اكتر يبقى انتي اندرتون بارد .

لو مش قادرة تحددي بالظبط انتي اي اندرتون فيهم يبقى هنعمل اختبار بسيط كده هنقدر نحدد من خلاله بالظبط الاندرتون الصح :

1- اول حاجة هنحتاج نجمع بعض الاقمشة بالوان مختلفة نصها بارد ونصها دافئ علشان نقدر نعمل مقارنة بينهم على بشرتنا ونشوف تأثير اللون ع حيوية ونضارة البشرة .

الألوان اللي هنحتاج نجمعها ( فوشيا وأورانج ، رمادي غامق وبني ، بينك وسيمون ، بيبي بلو و أصفر فاتح ، أصفر صريح و مستردة ، رمادي فاتح و بيج فاتح ، فضي ودهبي )

2- تاني خطوة هنعمل الاختبار ده في ضوء النهار بس مش تحت اشعة الشمس المباشرة يفضل يكن في فترة 10 صباحا وبشرط ان نقف وراء نافذة او بلكونة داخل منها ضوء الشمس ونضع مراة كبيرة ظهرها للنافذة .

3- لو كان الشعر مصبوغ يفضل وضع اسكارف ابيض عليه وتغطية جميع الشعر المصبوغ اما لو كان لون شعرك طبيعي فيفضل تركه بدون تغطيه ويفضل ايضا ارتداء تي شيرت ابيض اللون حتى لا تؤثر لون الملابس على التحليل .

4 - يمكننا الاستعانة باحد الاصدقاء او الاقارب لمساعدتنا في الحكم على كل عينة لون لأنه من الصعب أحيانا ان نحكم على نفسنا .

5- نبدأ الاختبار بوضع اللونين من نفس المجموعة تحت الذقن والنظر الى البشرة وليس اللون

 مثال : نضع اللونين من المجموعة الأولى الفوشيا والأورنج نضع الفوشيا اولى ثم نزيله ونضع الاورنج ونلاحظ تأثير اللون على البشرة وحول العينين ومنطقة حول الفم اي لون فيهم ترك ظلال حول العين والفم وجعل البشرة شاحبة واي لون ترك البشرة ساطعة وحيوية ؟؟ 

لو كانت الاجابة اللون الفوشيا أفضل فانت صاحبة بشرة باردة والعكس

 مثال اخر : ارتداء اكسسوار حول الرقبة او على اليد والمقارنة بين اللون الفضي واللون الذهبي اي منهم افضل تأثير على حيوية وتوهج لون البشرة ؟؟

 لو كانت الاجابة اللون الذهبي افضل فأنت صاحبة بشرة دافئة والعكس 

يمكنك تجربة جميع مجموعات الالوان المقترحة وتسجيل النتيجة فان كانت اغلب النتائج الالوان الباردة فانت صاحبة بشرة باردة والعكس صحيح ..  

.

بعدها ننتقل الى الأربع اقسام الرئيسية في تحليل الألوان وهو مايعرف ب

( The Four-season Analysis )

✨بعد مابنعمل الاختبار الاول اذا طلعت نتيجتك اندرتون بارد (cool undertone) فهنا هنبدأ نشوف لون الشعر ولون العيون

1- SUMMER🌞

هنندرج تحت القسم ده في حالة لو :

- لون الشعر بلوندي أو اشقر بدرجاته ، لون العيون فاتح.

- لون الشعر بني فاتح او متوسط ، لون العيون فاتح مطفي .

- لون البشرة في الحالتين يكون فاتح غالبا.

2- WINTER❄️

هنندرج تحت القسم ده في حالة لو :

- لون الشعر غامق بني أو أسود بدرجاتهم ، ولون العيون فاتح ساطع.

- لون الشعر غامق بني أو أسود بدرجاتهم ، لون العيون غامق بني أو أسود أو هازال. - لون البشرة ممكن يكون فاتح أو غامق.

✨لو طلعت نتيجتك من الاختبار الأول اندرتون دافئ (warm undertone) فهنشوف لون الشعر ولون العيون

3- SPRING💐

هنندرج تحت القسم ده في حالة لو :

- لون الشعر فاتح أو غامق أو أحمر ولون العيون فاتح أو هازال.

- لون البشرة غالبا يكون فاتح أو متوسط وممكن يكون فيها نمش.

4- AUTUMN🍁

هنندرج تحت القسم ده في حالة لو :

- لون الشعر فاتح أو غامق أو أحمر ولون العيون غامق أخضر أو أزرق أو بني أو أسود أو هازال.

- لون البشرة ممكن يكون فاتح أو غامق وممكن يكون فيها نمش.

الموضوع الجاي هنتكلم عن كل قسم منهم لوحده وهنزل باليت أو محفظة الألوان المميزة لكل قسم، اللي منها تقدري تختاري اللبس والمكياج ولون الشعر والعدسات والمجوهرات اللي هتميزك وهتكون رائعة عليكي وده هيخليكي أجمل وهيزود ثقتك بنفسك وبمظهرك دايما 😉🔥
HadeelGlam