فيتال ماسك بيل كلينيك - Bel clinic - ماسك ترطيب للبشرة الجافة المجهدة

هيللو ياحلوين🌹

.

لما بلاقي عرض أشتري قطعة تاخد الثانية مجانا بقلق 😂😅 أكيد في حاجة مش طبيعية يعني!

يا إما المنتج تاريخه قرب ينتهي، أو سعر القطعة الواحده أصلا ده مش قيمته الحقيقة وده غالبا اللي بيحصل خاصة لما يكون العرض ده شغال طول السنة🤔😯

.

من فترة أشتريت منتجين في عرض بيل كلينك اللي شغال أغلب شهور السنة في كل الصيدليات، ومع اني مكنتش مقتنعه بالعرض تماما ولا بسعر القطعة الواحده المبالغ فيه اصلا بس من كتر الضجة اللي حصلت عليهم قولت يمكن المنتجات فعلا كويسة والعرض حقيقي🤔

 .

⬅️أول منتج حبيت أجربه كان Vital mask

أنا بشرتي بتبقى جافة في الشتا واحيانا بيظهر فيها قشورخفيفة، والمنتج ده المفروض أنه بيوعد بترطيب البشرة وتغذيتها ونضارتها وسطور كتير كده من الوعود والمكونات الجملية،

بس ومع أول استخدام وأول انطباع على رأي اللي كان بيقول ( والله نفس الخلقة )🤣.

ايه ده طيب مفيش نضارة فين الترطيب طيب عالأقل !! سعره ليه 350 جنيه على حجم 80 مل بس !! السعر ده مبالغ فيه جدا جدا على ماسك وبالحجم ده لأ وكمان النتيجة دي !

.

علشان تفهموني أكتر يابنات بعد مابتغسلي وشك منه ملمس البشرة بيكون حلو فقط وبيديكي احساس بالترطيب، ولكن ده مش ترطيب فعلا لأن مع تاني مرة بتغسلي وشك فيها في اليوم بتلاقي النتيجة دي اختفت، المفروض عالأقل لو هو ترطيب عميق فعلا للبشرة نتيجته هتفضل للاستخدام اللي بعده لو هتستخدميه مرتين أو ثلاثة في الاسبوع زي ماهما كاتبين، أنا بستخدمه بقالي تقريبا شهرين ولكن ده مابيحصلش تماما.

.

حبيت اديله فرصه تانية في فترة كنت تعبانه فيها واهملت بشرتي شوية ومكنتش بستخدملها اي حاجة وبان عليها الإجهاد، قلت بس بقى اطلعوا تاني اجربه يمكن المرة اللي فاتت بشرتي كانت مش محتاجة نضارة اصلا وكنت مهتمه بيها كويس فمحستش بنتيجة، وهما اصلا قايلين انه رهيب للبشرة المجهدة والريفيوهات عليه بيقولوا اول ماتغسليه بتلاقي وشك منور ورايق والنضارة بتنط من كل حته، بس بردو النتيجة كانت (والله نفس الخلقة)!!

.

أنا مش هتكلم أكتر من كده عنه أخد أكتر من وقته الصراحة معايا، لو انتي جربتيه ياريت تقوليلنا رأيك فيه.
Hadeelglam